Өлім

Бесік пен бейіт бір ұғым,
Бейіт те сенің сыңарың.
Алшақ деп әсте ойлама,
Арасы жақын бір адым.
Бес күндік мына жалғанда,
Тәңірдің ескер сынағын.
Жалғанмен жаның қоштасса,
Қара жер болар тұрағың.
Белінде болып бабамның,
Жатырға дән боп тасталғам.
Топырақтық болмысқа ,
Рух болып түстім аспаннан.
Өмірге келген қонақпын,
Бесік пен бейіт – қос далам.
Баратын жерім – қара жер,
Екінші менің баспанам.