Жас

Мен кетемін... тақап қалды-ау жарты күн,
Жарты күннің қайтсем екен артығын.
Сен естелік қалдыр дейсің қиылып,
Не қалдырсам екен саған, жарқыным?!
Мен өзіммен ала кетем сан сырды,
Талай жасым топыраққа жаншылды.
Сағынғанда саулық тілеп тартар деп,
Тасбих қылып тастап кеттім тамшымды.
Өмір өзі-ақ түсіреді сабаға,
Сен де мені алтыныңдай бағала.
Ашыққанда таңғы шықтай тамшымды
Тары қылып қуырып же табаға.
Сен – биіксің, сен – ғажапсың десе де,
Сен мендегі махаббатты еселе.
Шөлдегенде шөл басарың болсын деп,
Көз жасымды сауып кеттім кесеге.